هذي يوميات حملة #تحرير_البنك_المركزي كتبناها في في شكل خواطر و ملاحظات مباشرة بعد نهاية كل يوم من الحملة.. الحملة الميدانية هي جولة على رواد القهاوي كل يوم سبت بداية من10الصباح لتوعية بوجود أجانب في لجنة القيادة بالبنك المركزي وجمع التواقيع على العريضة الشعبية.

اليوم الأول: السبت 02جويلية2019

**** حملة “طرد الأجانب” من “لجنة قيادة الاقتصاد التونسية”****

*** يوميات الحملة _اليوم الاول_ردود المواطنين***

– عنا اكثر من شهر ملي بدينا “الحملة الالكترونية” ضد تواجد “البراينية الاوروبيين”( و خصوصا الفرانسيسي ) ب”لجنة قيادة الاقتصاد التونسي” ب”البنك المركزي التونسي”( الي تتذكرو انو “البنك الدولي” فرضا فرضا استقلاليتو على الحكومة التونسية” و بالتالي تبعيتو للخارج “فرانسا”,”اوروبا” و”البنك الدولي”) .

بدينا الحملة ب”ستاتيات الفايسبوك” و”مقالات موقع الامة” . في 8 جوان عملنا “وقفة احتجاجية” قدام “المسرح البلدي” ( برمجناها اولا قدام “البنك المركزي” لكن الداخلية منعتنا بدون حجة ) .و من الجمعة الي فاتت ( تحديدا السبت 13 جويلية) قررنا الانتقال ل”الحملة الشارعية” .

قررنا ك”حزب قومي تونسي” نبداو “حملة جمع التواقيع” ل”العريضة الشعبية لطرد الاجانب من لجنة قيادة الاقتصاد التونسي) و اليوم 20 جويلية 2019 بدينا ب”الاتصال المباشر” ب”المواطنين التوانسة” في الشارع و تحديدا في القهاوي .بدينا ب”مدينة تونس” و انشالله كان قدرنا ربي بش ندورو “تونس كاملة” .

– اليوم انا فرحان علخر لانتقالنا من “الفايسبوك” و”شارع الحبيب بورقيبة” ل “الشارع التونسي” و “المواطن التونسي العادي”.و بما انو هاذا اليوم الأول ( نسينا معملناش تصاور) فانو فما ملاحظات حول ردود “المواطنين التوانسة” .

– بعد ماخططنا للحملة الشارعية-القهوية (تحديدا هدفنا هوا القهاوي) بقينا خايفين ,مترددين (اصلا فما اقتراح انو نبدو من “حومنا” باش ناخذو ثقة في رواحنا) .الواحد يحس روحو كيما “الممثل التجاري” و يعرض في المنتوج على جمهور “لا مبالي”/”مقعار”/”متعجب” او “فادد” لكن:

– المفرح علخر هيا الردود الايجابية المباشرة الفرحانة و المستقبلة (دعوات للتبنيك و شربان القهاوي و التصحاح المباشر مغير حتى جهد كبير للإقناع) اصلا الحق جبنا تصحاحات اكثر ملي توقعنا .اما هاذا مش الموضوع ..

– تواجهنا زادا زادا بالردود السلبية المتوقعة علخر و المحبطة و هاو بش نحاول نجملهم هنا

– 1. اللامبالي .”انا منيش تونسي” ,”متهمنيش تونس”.”ميهمنيش فيهم لكل”.”واش خص كان مت”,”نحب نهج منها لبلاد”….

-2.”المشكاك” .”باز فما فلوس”,”فما شكون وراكم” ,”فما شكون باعثكم” .”انتوما شكون” “بش تطلعو في جرتنا”.

-3.”الفهيم”.”هاذي شعارات شعبوية”.”خطابك يقنعهم هوما اما انا الشعبوية متمشيشي معايا”.”انا واقعي””شعب فاسد,شعب كركار ويحب سيادة”

-4.”المختص الاقتصادي”.”تونس متنجمش تعيش مغير ديون ولذا السيادة مستحيلة” .”انا مختص اقتصادي نحكي معاكم عارف” .”مستحيل هاذا”.

-5.”المثقف الثوري”( المناضل الطلابي اليساري سابقا) .”هاذا لا يستقيم”,”عريضة شعبية لطرد الاجانب متجيش”,”هاذا دور مجلس الشعب”.”الشعب انتخب نواب هوما يتصرفو” “هاذي حكاية فارغة انا مع الثورة الكاملة” .”انا مهندس الكترونيك بطال عندي عام”(يتكيف في “الميريت” وعندو تليفون يعمل 600 دينار وممكن اكثر ) .

-6.”السياحي” .”جدودنا خدمو مع اليهود و لباس”,”شنية المشكلة اجانب”,”اجانب خير من التوانسة”,”انا نخدم في السياحة ميهمنيش الاقتصاد”( السياحة باعترافو قطاع غير اقتصادي و انما عهري ) .

– هاذي ملاحظات اليوم الاول من اللقاء المباشر وين شنقابلو “التونسي ” مباشرة و نشالله نقعدو هكا على طول .هاذي بداية التجذر عبر أول قضية “قومية تونسية مقدسة” قضية “السيادة التونسية” في معركتها الاولى “طرد الأجانب من البنك المركزي” .

اليوم الثاني: 03أوت 2019

[ يوميات الحملة | اليوم2 | ردود المواطنين ]

حملة طرد الأجانب من لجنة قيادة الإقتصاد بالبنك المركزي.

عندنا أكثر من شهرين ملي بدينا الحملة، بدينا بمقالات فيسبوك و مقالة تشرح خدمة لجنة الإقتصاد التونسي بالبنك المركزي و الأجانب الموجودين فيها و عملنا حملة إلكترونية لجمع التواقيع على العريضة و عملنا وقفة احتجاجية يوم 8جوان قدام المسرح بعد ما منعتنا منطقة الأمن بباب بحر من الاحتجاج قدام البنك المركزي.
و تويكا من جمعتين بدينا في حملة لجمع التواقيع على عريضة للضغط على المجلس و الحكومة لطرد الأجانب من اللجنة هذي. بدينا حملة اتصال مباشر مع المواطنين التوانسا في العاصمة و تحديدا في منطقة لافايات و بالشوية بالشوية بش ندورو العاصمة كاملة بكل احيائها و ثم ولايات تونس الكبرى و كل ولايات البلاد من الشمال للجنوب، حملة بش تتواصل لسنوات.

#السيادة_التونسية 💪
#السيادة_المالية

السبت الي فات ما عملناش حملة، كان يوم جنازة الباجي و اليوم رجعنا نكملو الحملة وعملنا جولة في قهاوي لافايات.
المرة هذي رغم التعب و قلة النوم مالخدمة و السهريات روحت متحمس و ناشط علخر و كان يوم ناجح، تقريبا عملنا نسبة تجاوب 33٪ يعني على كل ثلاثة مواطنين نحكولهم على اللجنة و العريضة يصححولنا و الباقي كل واحد و حجتو، وعملنا تصاور اتو ننشرهم بعد شوية.

كان يوم ناجح علخر بالمقارنة مع المرة الاولى الي كانتلي فشل كبير جبت فيها إمضاء وحيد و شبعت فيها سب و كلام زايد و عملت عركتين.
والمرة هذي كل الحجج الي تقدمت نجمت نوسع بالي معاها من غير مانترفز..
بالعكس لقيت شكون يشعو فينا و الي استعونا لشرب قهوة و تعاطفو معانا وثما شكون صور نسخة من العريضة قلي يحب يجمع تواقيع.

كيف ما ثما حجج سلبية متاع إحباط والحق كنت متوقع سلبية اكثر من هكا، و بش نلخصها كالتالي:

1. كان مش فرانسا رانا ضعنا و فرانسا صديقتنا و عندنا معاها تاريخ كبير و هي اقرب لينا من غيرها.

2. شنوة المشكل أجانب يتحكمو في البنك المركزي، على الأقل هوما ياكلو و يوكلو معاهم و كان تبقى فيها توانسا أكاهو اتو ياكلو كل شي وحدهم.

3. احنا دولة مستعمرة تحت فرانسا و بش نبقو هكاكا طول عمارنا. وهذيكا هي الدنيا احنا مانكونو كان تابعين و مستعمرين من فرانسا.

4. أحنا(أعمارهم في 50) ماعادش نتصلحو و الأمل في الجيل الجاي. وتصحاحتنا زايدة ماعندك ماتعمل بيها.

5. الشعب التونسي بكلو فاسد وهوما خاطيهم ماعندهم الفساد و كان تنحو والا قعدو كيف كيف الفساد هو هو.

6. انا مانيش تابع تونس وبكري عرضو عليا الجنسية الدزيرية و ندمت الي ماقبلتهاش و ندمت الي اولادي جبتهم في تونس.

هذي كانت بعض الردود الي سجلتها و الي مزلنا مش بش تجينا ردود ما أخيب منها ببارشا، المهم قاعدين نطورو في حججنا لمةاجهة كل الردود السلبية و نطورو في خطابنا و طريقة اقناعنا للتوانسا وبعد 4ساعات نقاش في الحملة نروح بشحنة و طاقة جديدة تدفعني بشنبذل جهد اكبر و نفكرو ديما في أساليب جديدة لنشر الوعي السيادي بين التوانسا.

#السيادة_التونسية هي قضيتنا الاولى و الأهم و معركتنا تويكا من اجل #السيادة-المالية بطرد الأجانب من لجنة القيادة بالبنك المركزي.

صورة اليوم الثاني

اليوم الثالث: 10أوت 2019

[ يوميات حملة #السيادة_التونسية | اليوم3 ]

جمع التواقيع على عريضة لطرد الأجانب من لجنة القيادة بالبنك المركزي التونسي.

هذا ثالث يوم نخرجو فيه لجمع التواقيع على عريضة طرد الأجانب من لجنة القيادة بالبنك المركزي.
رغم الي قهاوي العاصمة كانت شبه فارغة إلا أنو نسبة الإستجابة كانت اكبر من النهارين الي فاتو.
ممكن يرجع هذا لنو خطابنا و لوغتنا قاعدة تتطور و الحجج متاعنا في النقاش ولت أكثر اقناع بكثر الحديث مع المواطنين.
اليوم بعد ثلاث ايام في بعض قهاوي العاصمة وصلنا جمعنا 67 إمضاء و هدفنا بش نحكو مع 12مليون تونسي ويسمعونا ويناقشونا مهما كان عدد الي صححولنا.

بالنسبة ليا تقريبا نصف الي شرحتلهم هدف الحملة و حكيتلهم على اللجنة وافقو على الإمضاء و ثما الي رفضو الاستماع جملة و ثما الي إعتذرو ببارشا حجج كالعادة:
– الي هو “ضد كل شي في البلاد و يحب يصير انقلاب ويشدها واحد كيف بن علي”
– التونسي اليائس، “حتى ولو صححولكم 12مليون تونسي ماعندكم وين توصلو”

الحق أول ما قررنا بداية حملة جمع التواقيع على العريضة، توقعت بش نتواجهو مع تجاهل كبير من المواطنين و توقعت يقولولنا حكاية فارغة الي تعملو فيه و توقعت بش نتسبو و ممكن نتضربو..
لكن الي صار العكس تماما، كل يوم نخرجو فيه للحملة يكون أحسن من اليوم الي قبلو. و نلقو ناس تشكرنا و تقوللنا يعطيكم الصحة و يشجعونا بش نواصلو و لقينا شكون من متابعنا على الفيسبوك و فرح بينا هو وأصحابو.

#السيادة_التونسية
هي قضيتنا الاولى و الأهم و معركتنا تويكا من اجل #السيادة-المالية بطرد الأجانب من لجنة القيادة بالبنك المركزي.

اليوم الرابع: 17أوت 2019

[ عريضة طرد الأجانب | اليوم 4| يوميات الحملة]

للتذكير و للي يحب يفهم شهوة هالجملة..
قبل أشهر فقنا بوجود لجنة في البنك المركزي تخدم من خمسة سنين وفيه اجانب أعضاء في وسطها منهم سفير فرنسا و ممثل على الاتحاد الأوروبي و و و مع العلم معاهم وزراء و أساتذة جامعيين توانسا و يرئسها محافظ البنك المركزي.. كل المعلومات الرسمية على اللجنة لقيناهم في بيان منشور في الموقع الرسمي للبنك المركزي.

من وقتها كتبنا مقالات في صفحة الروح التونسية و الموضوع لقا اهتمام كبير و احنا ماوقفناش حد الكتيبة بل عملنا وقفة احتجاجية و عريضة إلكترونية و هبطنا للشارع التونسي نجمعو في التواقيع على عريضة نضغطو بيها على المجلس و على رئاسة الحكومة لطرد الأجانب من اللجنة و فتح تحقيق في شكون سمح بوجودهم في لجنة توجه في البنك المركزي و في السياسة الاقتصادية للبلاد.

هذا يسبت الرابع الي خرجنا فيه العريضة، كملنا زوز قطاعات في وسط العاصمة الي بين شارع شارع محمد الخامس و بين الهادي شاكر و السبت الجاي ننطلقو في القطاع الثالث لافايات.

اليوم السادس: 31أوت 2019

[ عريضة تحرير البنك المركزي | اليوم6 | يوميات الحملة]

#قطاع_لافايات
#السيادة_التونسية

اليوم نكونو عملنا6 أيام كل يوم سبت الصباح نعملو جولة على قهاوي منطقة محددة، يوم آخر و انجمو نكملو قطاع لافايات كاملة الي لمدنا فيها اليوم23 امضاء وهكا نكونو وصلنا121 في الجملة في القطاعات الثلاثة الأولى.

الشهرين الجايين سبتمبر و أكتوبر بش نوقفو الحملة في الشارع بش مانتخلطوش بجماعة الحملات الانتخابية، أحنا بطبيعتنا من تو بارشا ناس يسخايلونا متاع انتخابات نبقو نوضح لهم الي هذي حملة من أجل #السيادة_التونسية.
انشاله نرجعو نكملو الحملة بعد ماتوفا الانتخابات الرئاسية و التشريعية.

* حول تفاعل المواطنين:
غير كل الحجج الي ديما تتعاود و أكثر يقلك ما انجموش ناخذ استقلالها و ما يخلونا و اتو يتجاهلوكم و ماعندكم وين توصلو و و و… هذي في الأغلب حجج الشباب الفاقدين للأمل و نسبة كبيرة منهم نقنعو الي احنا انجمو و يكتب اسمو و يصحح.

إضافة للي مايتقلقوش كيف تجبدلهم على تدخل الأجانب و هاذم في أغلبهم كبار في العمر فوق50 الي يقلك “شنوة المشكل اجانب يتحكمو فينا” و “بالكشي جاو بش يعاونونا” و “هي خلات خلات خليهم يكملو يحكمو في البنك المركزي”.

ملخر قاعدين نتقدمو ببطئ بخدمة زوز من الناس المهم نتحركو و ننشرو في وعي بالسيادة التونسية في الشارع وعي يطرح قضية مبدئية وقيمة سامة بش ترتقي بوعي الأمة التونسية بعيد على كل تفاهات ومعارك الأحزاب التونسية للنضال لأجل إستقلال نا الحقيقي و التخلص من التبعية الأجنبية و الفرنسية بالأخص، قضية ينجمو التوانسا يتعبو و يضحو و ممكن يموتو على خاطرها.

اليوم السابع: 23نوفمبر 2019

#[ يوميات حملة #تحرير_البنك_المركزي]

اليوم رجعنا لحملة جمع التواقيع على عريضة رفض وجود أجانب في لجنة القيادة بالبنك المركزي التونسي.

بعد ما غبنا مدة 3أشهر بش ما نتخلطوش بجماعة الحملات الانتخابية..

أحسن فكرة عملناها المرة هذي كيف لبسنا دوسارات مكتوب عليها #السيادة_التونسية و شعار الحزب.. الي خلقتنا أحسن نقاشات وأحنا مروحين في الطريق، مانحيتش الدوسار وبقيت لابسها من لافايات لين رجعنا للمقر في أريانة.

في الأول مع مجموعة فيراج في محطة الميترو، واحد من الاولاد قالولنا انتم شكون و شنوة يمين والا يسار؟ ومن غادي تحل نقاش.

الثاني اول ما طلعت في الميترو راجل كبير طرح عليا سؤال انتم شكون؟ وبقيت نحكي معاه على الحزب و السيادة التونسية و حملة تحرير البنك المركزي من الأعضاء الاجانب لين هبط من الميترو.

اليوم الثامن: 7ديسمبر2019

اليوم الثامن للحملة..
#السيادة_التونسية
#تحرير_البنك_المركزي

أكثر ساعتين نستمتع فيهم في الجمعة كاملة..
هوما الساعتين هاذم الي ندور فيهم و نعمل اتصال مباشر مع المواطنين و نحكيلهم غلى قضية مبدئية كبيرة و على السيادة التونسية و الإرادة الإيمان بلي تونس تنجم تحقق الاستقلال الكامل وتتخلص من السيطرة الأجنبية..

مازالت قدامنا خدمت أعوام وسنين في حملات نشر الوعي السيادي والقومي.
السبت الجاي الحملة بش تكون في ولاية ڨابس (وذرف و المطوية) .
في مقهى سياسي للحزب في أول اجتماع خارج ولايات تونس الكبرى.


2 تعليقين

رد الحزب القومي التونسي على بيان البنك المركزي حول "لجنة القيادة" - الحزب القومي التونسي · 11/12/2019 في 7:24 م

[…] إنطلقنا في حملة جمع تواقيع من المواطنين على عريضة تدين الخرق الواضح من هذه اللجنة للسيادة التونسية، لازالت هذه الحملة متواصلة. إضغط هنا […]

حملة تحرير البنك المركزي - الحزب القومي التونسي · 12/12/2019 في 1:23 م

[…] للإطلاع إضغط هنا […]

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *